B.A 3rd semester khukni kokrwbai tamo hin? Bini bedek buprano Phunukmari riwi swidi?

 

                 B.A 3rd semester kokborok
                         Major paper:-5
                              Mark:-12
1) khukni kokrwbai tamo hin? Bini bedek buprano Phunukmari riwi swidi?
Ans:- khukni kokrwbai wngkha khukbai khugo bosong chobwi pirini simi piri salai phailaimano hinjago. Sana thangkhe khukbai khugo sajagwi phaimani tei khwnaui salai phaimani hinjago.
Khukbai khugo kochogwi sajagwi phaimani.
khukni kokrwbaini bedek buprarok wngkha -
i) kok-bokhiri.
ii) phumukmung.
iii)swraimung.
iv) Rwchapmung.
v) Kerang kothoma.
Vi) Luku thungmung akorok.
i) kok-bokhiri : - Kokbokhiri wngkha dalsa khukni kokrwbai bedego kwlaio. Kokbokhiri sajakma wngkha borokrokni tongmung - Chamung, kaham-hamyano, nok-nukhung ochaino twiwi, nobar twibar, sal talno twiwi, chwla-bwrwini kaham-hamyano twiwi, luku puitu, luku raidano twiwi sajago.Kokbokhiri wngkha kaisa phwrwngmungo kwlaio. Bini Phunukmarirok wngkha Swi khitung de wasungo daui peng, Ochaini nogo bemar kakya akorok."Swi khitung de wasungo daui peng"
*O kokbokhirini kokbwrwng wngkha swi khitung pengya wngmano borokrokni tongmung-chamung loi swlaijakya wngmani kokrokno kok khitarwi sajakha.borokrokni tongmung-chamung loi swlaijakya wngmani kokrokno kok khitarwi sajakha.
ii) Phumukmung :- kokborok luku kokrwbaini bisingo phelokmung wngkha belai kwchamkuk. Phelokmung wngkha kaisa swngmung. O swngmung nobar bai gwdaljak, Hoda hukumu bai gwdaljak phano wngwi mano. Agini jorao huk-habao tei nokhwla nukao achuklai pheloklai phailaimani nukjago.Bini Phunukmarirok wngkha---Buphang phangsa Bwlai laisa, Rajani Latha tangwi Manya tei nokha gwrwngya kothor kwlaio akorok.* "Rajani Latha tangwi Manya "O phelokmungo Rajani Latha romwi Manya hinwi sajakma manwini mung wngkha chibuk. Kok kwrwngrok kaisa kokno Sana thangthani hamung siniya kok khitarwi swngo.
iii) Swraimung :- Borokrokni bisingo jolima, Naslema, musuma, kena nangma, tongmani bagwino bwkha hiligwi tongmano helengrina bagwi swraio.Chini tipra dophano karwibo kubuni hodao bo abotwi swraimung swraijagwi tongmani nugo. Abotwi swraimungrok kokborok kokrwbaio kwbangma ma tongo --"Laiphang kwbagwi ma thwithung, Sikamuk kwpal manthung, tei thapwla kobongtwi kobongthung" akorok. "Ano khibiui buibai nwng thangkhe Wansuk kulmanya wngthung " * Swraimungni kokbwrwng wngkha hamlai tonglaimani bero khoroknwini bisingo jeba khoroksa kha swbaiwi yakarwi thangkhe a borok kubuni borokno hik EBA songwi thangkhe talikhao thwiya sak birman manwi mang tongthung hinwi swraijakmani. iv) Rwchapmung :- Rwchapmung wngkha borokrokni langmao kha Tongthok phuru, khaswrang phuru, kha khamphuru tei apsa kwlwino bandi phuru rwchapjago. Abono karwibo teibo kwbangma jorao o rwchapmung rwchapjagwi tongo.Aborok wngkha Mamita, Lebang, Goriya Akorok.* A bisingo kaisa rwchapmungni .Phunukmari wngkha ---"O bai koto o bai chikon Phaidi phaidi phaibaidi Phaidi bayapsong" Hukni Mai bubar kiyokma jorao Lebang mungwi dalsa yung kwlaio. A yungno  rwknani bagwi rwchapmungni bisingtwi kamini bai koto bai bai chikon tei palsongno logi sanmani.
V) Kerang kothoma :- Dangaima dangaiphani simino khuk bai khugo sahorwi Manya jorani simi o kerang kothoma kochokjak. Tipra dophao sajagwi tongmani kerang kothoma kwbangma tongo. Aborok wngkha -Yamroksa, khumpui, Chethuwang, nuai tei mayung kuphur akorok.
vi) Luku thungmung :- Luku thungmung wngkha lukurokbai thungjagwi tongmani. O Luku thungmung hayungo kubuni bosongni tongma hai Tipra dophao bo tongo. A thungmung rokni mung wngkha - Kadong Kadong, chokeleng keleng tei mokol kholpma akorok.
Rosamung :- O khukni kokrwbai
belai ari Kotor, khukni kokrwbai tongmani bagwino tipra dophani borokrok khorok tisaui Sinimung manjak. Khukni kokrwbai kwthang tongmani bagwi hukumu mukumu bo kwthang wngwi bachajak.